Bandi Bhageerath POCSO Case: బండి భగీరథ్ కోసం నాలుగు బృందాలతో ముమ్మర గాలింపు

ది డిజిటల్ బ్రీఫ్ 

హైదరాబాద్, మే 16, 2026:

బండి సాయి భగీరథ్ పోక్సో కేసులో తెలంగాణ పోలీసులు గాలింపును ముమ్మరం చేశారు. అజ్ఞాతంలో ఉన్న బండి భగీరథ్ కోసం నాలుగు ప్రత్యేక బృందాలను ఏర్పాటు చేసి విస్తృతంగా సోదాలు నిర్వహిస్తున్నట్లు సమాచారం.

భగీరథ్ కోసం హైదరాబాద్‌తో పాటు ఢిల్లీ, కరీంనగర్ ప్రాంతాల్లో కూడా పోలీసులు తనిఖీలు చేపట్టినట్లు తెలుస్తోంది. ఢిల్లీలో కొంతమంది బీజేపీ నేతల రక్షణలో భగీరథ్ ఉన్నట్లు సమాచారం రావడంతో తెలంగాణ పోలీసులు రంగంలోకి దిగినట్లు సమాచారం. ఈ నేపథ్యంలో లుక్ అవుట్ నోటీసులు కూడా జారీ చేసినట్లు తెలుస్తోంది.

ఇదిలా ఉండగా కేంద్ర మంత్రి Bandi Sanjay Kumar నివాసంతో పాటు కరీంనగర్‌లోని భగీరథ్ మేనమామ వంశీకృష్ణ ఇళ్లలో కూడా పోలీసులు తనిఖీలు నిర్వహించినట్లు సమాచారం. కేసుకు సంబంధించిన ఆధారాలు, భగీరథ్ ఆచూకీ కోసం అధికారులు సోదాలు కొనసాగిస్తున్నట్లు తెలుస్తోంది.

మరోవైపు భగీరథ్ ఇప్పటికే పోలీసుల అదుపులో ఉన్నట్లు ప్రచారం జరుగుతోంది. సాయంత్రంలోగా అతడిని మేడ్చల్ కోర్టులో హాజరుపరిచే అవకాశం ఉందన్న వార్తలు వినిపిస్తున్నాయి. అయితే దీనిపై అధికారికంగా పోలీసులు ఇంకా ఎలాంటి ప్రకటన చేయలేదు.

లొంగుబాటు లేదా అరెస్ట్ వార్తల నేపథ్యంలో పేట్ బషీరాబాద్ పోలీస్ స్టేషన్ వద్ద భారీ బందోబస్తు ఏర్పాటు చేసినట్లు సమాచారం. అదనపు పోలీసు బలగాలను మోహరించి పరిస్థితిని పర్యవేక్షిస్తున్నారు.

ఇప్పటికే ఈ కేసు తెలంగాణ రాజకీయాల్లో హైప్రొఫైల్ వ్యవహారంగా మారింది. SIT విచారణ, రాజకీయ ఆరోపణలు, కోర్టు పరిణామాల మధ్య ఇప్పుడు పోలీసుల ముమ్మర గాలింపు మరింత సంచలనంగా మారింది.

గమనిక: ఈ కేసులో నమోదైన ఆరోపణలు ప్రస్తుతం దర్యాప్తు దశలో ఉన్నాయి. సంబంధిత వ్యక్తులపై వచ్చిన ఆరోపణలు ఇంకా నిరూపితం కాలేదు.